Hi Nwa Hi Kolwa Giredi 8 Mbita ya Mudyondzi

HI NWA HI KOLWA GIREDI 8 i buku leyintshwa yo letela vadyondzi va Giredi 8, leyi simekiweke ehenhla ka Xitatimende xa Pholisi ya Kharikhulamu na Makambelelo (XIPHOKHAMA) eka Xiyimo xa le Henhla Tigiredi ta 7-9. Nongonoko wa tibuku ta Hi Nwa Hi Kolwa wu avanyisiwile hi tibuku tinharhu ku nga: Mbita ya Mudyondzi, Xihlovo xa Mudyondzisi na Buku yo Hlaya. Mbita ya Mudyondzi Yi na tidyondzo leti ti endlaka leswaku mudyondzi a nwa dyondzo a kolwa. Yi aka ehenhla ka vutivi bya mudyondzi bya khale. Buku leyi yi andlariwile hi ndlela yo olova swinene ku endlela leswaku mudyondzi a mama Xitsonga a kondza a kolwa hakunene. Xihlovo xa Mudyondzisi I buku leyi Mudyondzisi a kelelaka dyondzo eka yona a yi chela embiteni ya Mudyondzi leswaku a nga omelwi. Hi tlhelo ra Makambelelo, ku kombisiwile na tinxaka to hambana ta wona. Xihlovo lexi xa Mudyondzisi xi na xikombiso xa rhubiriki yo hlela switshuriwa. Buku yo Hlaya Leyi i buku leyi vadyondzi va tikhorisaka hi ku hlaya swirungulwana, switlhokovetselo, ntlangu na mintsheketo leswi va hungasaka hi swona va ri karhi va dyondza ta vutomi.